ЧЕДИИШКИННИГ КЭЭР БИС

Сөзү: А.Ч.Кууларныы

Чаа-дайын билбес

Чашкы базым сактып,

Чааш аъдым мунган

Чалгаан малым дозар.

Кайгамчыктыг чараш,

Каптагайда ховар,

Каас-чараш Тывам,

Каяа-даа бол, кады.

Өгбелерден дамчаан

Өскерилбээн дылдыг

Өзек болган дипте

Өскен черим – Тыва.

Ак-көк Тывам, өршээ!

Армейжи болуп,

Ада-чуртум бодап

Аъттаныптым, чонум.

Байлак Вера угбам,

Байыскылаң кезек

База биске чижек,

Баргаш келген чери.

Бүрзекей Сат база

Бүдүштүг эр Дончут –

Бүзүрелдиг эштер.

Бүгү чонум билир.

Кечил-оол дээш, Шома,

Кезек оолдар сывырган

Кээргел билбес дайзын

Кезеп, ырбап дескен.

Тыва эрлер тулушкан.

Тынын безин бодаваан.

Дидимнери Норжуң, Дарья -

Тиилелгениң кыстары!

Чалданыш чок халдааш,

Чаалааны - тайбың.

Чазак база чону

Чарлаан ады мөңге.

Мөңге отка кезээде

Мөгеер бис салгал.

Мөңге дириг маадыр

Мөөң чонум күжү!

Бактың багы дайзын

База катап халдаан.

Барбас аргам чогул.

Бандералар калчаа.

Тайбың чурттап чораан

Тараачынче халдаан.

Талыгыр бол, хоржок,

Таптап баскаш келийн.

Делегейге тайбың

Демниг чораан чонче

Дерзии, каржы фашист

Дээрбечилер келген.

Хоорай, суурнуң чонун

Хомудады берди.

Хостуг эрге база

Хосталганы берээл.

Чүргүй-оолдуң ылгын

Чүгүрүк демир аъдын

Чүгеннепкеш, мунгаш,

Чүгле бурунгаарлаайн.

Катюшаның одун

Катап база кыпсыйн,

Кара бажым камнаан

Каң-на бөргүм кедейн.

Кадыг ажыл-ишке

Кадыкканым эштер

Кара черге хонар.

Кайын тоор бис, Тыва.

Чонум чоорган болгай

Чорудуп тур дуза.

Чоттунуптар аржыыл,

Чодам, будум доңмас.

Манчы-хуужуур маңаа

Магалыг чүүл чок бол,

Мага-бодум бүдүн -

Маадырның сөзү!

Дүнелерде удувас,

Дүшкүүрей бээр дайын.

Дүвүреве, чонум,

Дүлгээзиннер доостур!

База катап чонга

Бандералар турбас.

Баштайгы дег эки,

Байлак чурттай бээр бис.

Оолдарың шупту

Онча келбес-даа бол,

Орнукшуткан эштер

Одуругда мөңге!

Четтикпейн манаан

Черим-чуртум чону,

Чедип кээр бис, Тывам,

Чедиишкинниг кээр бис!

21.12.2023 чыл