Стихотворение «Тывам кызы»

Мөңгүн-Тайга ирбиш чурту

Мөкүлчек-ле сарлыктарлыг.

Мөңгүн-Тайга кыстарынга

Мөгеер мен, ажыл-ишчи.

Өвүр кожуун база байлак -

Өлчей, кежик чонун каастаан.

Өңгүр, чараш торгу кеткен

Өвүр кызы өөрлерлиг мен.

Бай-ла-Тайгам барыксанчыг,

Балык, байлаң Кара-Хөлде.

Бараалгаткан ыры-самныг

Бай-ла-Тайгам кызы чараш.

Барыын кожуун Мажалыкка

Базар кезип баргылаар мен.

Баштак кыстар мени көргеш,

База кааптар караа чараш.

Сүт-ле-Хөлум магадаар мен -

Сүлде бедик мөгелерлиг.

Сүт-Хөл кызы чоргаар, топтуг,

Сүмележир ажык чаңныг.

Чөөн-Хемчиим төөгүлүг чер,

Чөпшээрежип мөгеер мен.

Чөөн-Хемчиим кызы эргим -

Чөлеңгиижим, чоргааралым.

Тес-Хемим дендии чараш -

Теве-Хая адан олчаан.

Тес-Хем кызы дески чараш,

Демниг эжи болуксаар мен.

Бии-Хемим билдингир бай -

Биеэ шагдан хааннар шилээн.

Бии-Хем кызын сонуургаар мен -

Билзек солчуп чурттаксанчыг.

Кызыл хоорай - найысылал.

Кыстар, оолдар, сургуулдар хөй.

Кызыл хоорай кыстарынга

Кызыл чечек сунуксаар мен.

Каа-Хемим кайгамчыктыг,

Катап-катап барыксанчыг.

Каа-Хем кызы дужуксанчыг

Кады чурттап чоруксаар мен.

Таңды кожуун тайгаларын

Таваар кезип чоруксаар мен.

Тамчык кады чурттаксанчыг

Таңдым кызы таан чараш.

Чаа-Хөлүм шыгжамыр суу

Чалгып чыдар, улуг, делгем.

Чаа-Хөл кызын чаптап көргеш,

Чалыы үем эглип келир.

Улуг-Хемим делгемнерин

Ужар куш-ла эргип шыдаар.

Уран чүүлге алдарлыг-ла

Улуг-Хемим кызы чараш.

Чеди-Хөлүм чараш, каазын

Чежеге-даа эргиксээр мен.

Чеди-Хөлүм кыстарынга

Чергележип чоруксаар мен.

Эрзин кожуун эки оран.

Эргип, барып дыштаныр мен.

Эрзин кызы эргим кыстар

Эдеришкен эштерим боор.

Тере-Хөлүм дески чараш,

Терең хөлде Пор-Бажыңныг.

Тере-Хөлдүң кызын көргеш,

Дески эвес чүрээм согар.

Тожу кожуун тоолчургу,

Тодуг, чылыг, байлак чоннуг.

Тожум кызы кожа чорда

Тоолда кирген маадыр мен.

Тыва чуртум - мээң чуртум,

Тыва чонум - мээң чонум,

Тыва дылым - мээң дылым,

Тывам кызы - мээң эжим.