АНКЕТА

АЛДЫН-ХЕРЕЛ БУЯНОВИЧ НОРБУ

Кызылда Цеченлинг сарыг шажын хүрээзиниң Чамзот (администратор) лама башкызы. 

Сес ак меңгилиг, суг олуттуг, көк мечи чылы, сылдызы – ийистер.

АМЫДЫРАЛ-ЧУРТТАЛГАДА САЛГАН СОРУЛГАЗЫ? Шажын-чүдүлге ажылдакчызы кижи болганымда, бөдүүн чүдүкчүлерге – тыва чонумга, хире-шаам-биле дуза чедирер, оларның амыдыралынга таваржып келир хилинчек-човулаңны чиигедир, сагыш-сеткилин өөртүр сорулгалыг ажылдап чоруур мен. 

ТЫВАНЫҢ КАЙЫ БУЛУҢУНГА БАРЫП ЧЕТПЭЭНИЛ? Чурумалдыг Тывавыстың барык бүгү булуңнарынга четкен мен. Чүгле Тожу болгаш Мөңгүн-Тайга кожууннарга барбаан-дыр мен.

ЭР КИЖИНИҢ ААЖЫ-ЧАҢЫНГА ХАМААРЫШТЫР БОДАЛЫ? Эр кижи сөглээн сөзүнге ээ болур. Өгбелериниң болгаш ада-иезиниң чагыг сүмезинден хая көрүнмес, ону  шыңгыы сагып чоруур, быжыг туруштуг, мөзү-шынарлыг, шажын-чүдүлгениң дүрүмнерин хажытпас, улуг Россияның, ооң иштинде өскен-төрээн Тывазының төлептиг хамаатызы болур ужурлуг.

ЫНАК ЧОГААЛЧЫЗЫ? Шажын-номналдан хостуг үемде, уран чогаалды база  номчуп чор мен. Колдуунда, фантастика жанрынга бижиттинген номнарны, чижээ Дмитрий Лукьяненко деп авторнуң чогаалдарын сонуургаар чордум. Тыва номнардан Иргит Бадраның «Арзылаң Күдерек» деп романын, ол ышкаш Степан Сарыг-оолдуң «Саны-мөге» деп шүлүглелин номчуп доостум. Сарыг-шажын өөредилгезинге хамаарыштыр алырга, Чхе Цонхаваның «Ламрим Ченмо» (Хосталганың улуг оруунуң чадалары), Индияда лама башкыларның бижээн номнарын, ооң иштинде, сураглыг индус шүлүкчү, философ Шантидеваның VIII векте бижээни «Бодхитсаваның оруу» дээш оон-даа өске шажын ажылдарын өөренип,  номчуп чоруур мен.