Шагааны чаңчыл ёзугаар уткууру

Бо чылын Шагаа февраль 20-ден 21-че үнер деп Тываның Дээди Хуралының чарлыы үнген. Ада-өгбениң чаңчылдарын сагып чоруур кижиге ол белеткелди бо хүнден тура эгелээриниң демдээ болур. Шагааның мурнунда айны Бүдүү ай дээр. Бо үеде чон Шагаага белеткелин эгелей бээр ужурлуг. Номчукчуларывыска ажыктыг болзун дээш, Шагаа байырлалынга канчалдыр белеткенип, чаа чылды уткуп алырының дүрүмнериниң дугайында чугаалап бээрин рубрикавыстың эксперди Ялэва хамны диледивис.

“Шагаада эр хиндиктиг улус эвээш-биче-даа бол чемин чажып, чалбарып, саңын салыр болза эки. Саң салырда чүгле бодунуң хей-аъды эвес, а чоок чурттап олурар кижилериниң, ажы-төлүнүң, улуг кижилериниң хей-аъды бедик болзун дээш салыр. Сөөлгү үеде эр кижилер чүнү-даа тооксавас апарган, хамнарга-даа, хүрээге-даа, цыганнарга-даа баарга чүгле херээжен улус. Чүгле сөөлгү беш-алды чылдан бээр, ылаңгыя Шагаада, эр хиндиктиг чонувус база ёзулалдарны кылып эгелээнин эскерип тур мен”, - деп Ялэва камгалакчы чугаазын эгеледи.

Шагаа саңының утказы

-Шагаада соок кыш сол-менди эрткенин, база бир чылдың төнчүзүн демдеглеп, четтиргенин илередип турар деп болур. Ол ышкаш Шагаа үезинде долгандыр турар бүгү-ле чүүлдерниң – Черниң, Дээрниң ээлери оттуп эгелээр. Олардан камгагалды, үнүп олурар чаа чылды эки чурттап эртеринге херек күштү дилеп алыр ужурлуг. Ол ышкаш саң салырда чыглып келген эр улус тоннарын кактап, арыгланып алгаш чанып келир. Саң салыры – Шагаада эртер ёзулалдарның эң күштүү.

Кыс хиндиктиг улус өөнге аъш-чемин кылып, чаа үнген хүнче сүдүн чажар. Ажы-төл Шагаа дүжүп келгенин эртир удувас дээш кызар. Чаа хүн үнүп келирге оюн-тоглаа эгелээр. Бистиң өгбелеривис ол хүнде орун-дөжээ, ширтектеринден эгелээш, бар-ла идик-хевин харга кактаар турган. Эрги чылдың хири артып кагзын, чаа чылче ону албас деп демдеглеп турары ол. Ону кактап-кактап алгаш, дедир өгже киирери база ужурлуг турган.   Амгы үеде ол ёзулал база уттундурган.

Мээң кырган-авам ук чаңчылды биске айтып берген болгаш ам-даа боду сагып чоруур. Харга кактаан тоннарны, ширтектерни, чоорган-матрацтарны киирерде чемгерипкаан артыш-биле артыжаар. Чемгерипкаан артыш дээрге саржаг-биле чаап каан артыш-тыр. Ооң чыды онзагай. Ынчаар артыжаар ужуру – эрги чылдың хири, алгыш-кырыжы, аарыг-ажыы дедир бажыңче кирбезин дээш. Ол идик-хеп, орун-дөжек чаа саткан ышкаш апаар. Ынчаар артыжаан эт-сеп, идик-хеп бүдүн бажыңның чыдын чаагай кылыптар – саржагсыг, артышсыг болур.

Каът бажыңга Шагаа

-А каът бажың чурттакчылары канчаар? Бо үеде Шагаа мурнунда генералдыг дээривис арыглаашкынны кылып, бажыңны чуп үндүрүптер болгай бис. Хевистерни хевис чуур черлерге чугдуруп алыр. А артыжаарда канчаар артыжаарыл?

-База-ла бажың иштин аартыжааш, чүгле подъездче үндүрүптер апарган. Шынында подъездтен дашкаар, үндүр артыжаар ужурлуг. Подъездке кожаларыңарның үндүр артыжаан багай чүүлдери база артып калыр болгай. Эжииңерни ажыдыптарыңарга-ла, катап кирип келир. Ынчангаш шуут даштыгаар үндүр артыжап алырга эки. Чүгле арыглаашкын ёзулалының соонда бажыңче кирип, аштанып-чемненип болур. Хондур удувайн, аштанып-чемненип, оюн-тоглаа эртирип хонган болзуңарза, оттуп келгеш, дораан кактанып чоруй баар ужурлуг. Чүгле ооң соонда чемненир.

-А кайы үеде удуп болбазыл?

-Саң салып турар үеде.

-Удуп калыр болза, кижини дириг улус санынга киирбейн баар деп чүве шын бе?

-Чок. Удуп болур. Мени база бо-ла улус: “Чүге удуп калдыңар? Силерни өлүг улус аразынче санап каапкан!” - деп коргудар. А мен шылап калган болзумза, удуп чыдып алыр мен. Хамнарда ындыг чүве чок. Хам кижи бүрүзү дириг кижини өлүг мөчүден ылгаптар чүве болганда, Чер-Дээрниң ээлери удуп чыдар кижини өлүг кижиден черле ылгаптар. Удувас деп чугаа кайыын тыптып келгенил? Мээң бодалым – эртир удувас дээш. Хүннүң бир дугаар херелдериниң күжү дыка улуг болур. Ол күштү сиңирип алыры-биле эртир удувазын бодап чогааткан ирги бе?

-Шагааны арага-дары ижип уткуп болур бе?

-Чок, хоруглуг. Шагаада арага ишпес дээрге-ле Чер-Дээр ээлерин хүндүлеп, арыг, элээр уганныг эрги чылды үдеп, чаа чылды уткуп, ам бир чыл улгадып, угаан-медерели өзүп-быжыгып келгениниң демдээ болур ужурлуг. Кижи чуртталгазының чаа чылынче, чаа чадазынче үнүп келгенин ханы билген турар ужурлуг ышкажыл. Эзирик кижи Чер-Дээр ээлеринден аас-кежикти канчап дилээрил?

Шагааның суй-белээ

-Шагааның суй-белээ кандыг болур ужурлуг? Белек-селек орнажыр деп чаңчыл турган бе?

-Шагаада аалдажыр болганда, өглерге куруг кирбези-биле аъш-чемниг барып болур. Чижээ, ак чемниг. Албан-биле Шагаада белек сунар деп чаңчыл чок. Алдын-мөңгүн, аар өртектиг белектер берген ажыы чок. Сөөлгү үеде тыва аяктар белекке бээр апарган. Ол аяктар база куруг турбас, чигир-чимис, шоколад-биле дүптеп алыр. Черле аяк-саваны куруг сунмас, ылаңгыя чыл эгезинде. Меңээ кээрде чонувус тыва шайлыг, артыштыг келир. А мен камгалалдарны кылып бээр чаңчылдыг мен.

-Тывада Шагааны кыдат ай санаашкыны ёзугаар эртирип турар. Ынчангаш Шагаавыс соок үеде эртип турар. Кыш төнгенин, час эгелеп турарын демдеглээр арга чок. Мээң билирим-биле шаанда Шагааны чазын хүн биле дүннүң деңнежип турар үезинде уткуур турган.

-Ийе, үш айның 28-те.

-Ол үеде чүге эртирип болбазыл? Азы болза күрүне, чурт деңнелинде кыдат чурагай-биле эртирип турза-даа, бистиң өг-бүлевис час келирге эртирер деп шиитпирни үндүргеш, Шагааны ынчан уткуп болур бе?

-Хүн-дүннүң деңнежип турар үези Дээр эжии ажытынып турар үе. Ынчан дириг-өлүг улустуң санын санаар. Кижи-биле эрткен чыл дургузунда чүнү болуп турганын сайгарып көөр. Ол хүннү демдеглексеп турар болзуңарза, бедик черге барып, саңдан салып болур, аъш-чем, тараа-быдаа өргүп болур. Ол ышкаш дүн-хүн дуртунуң деңнежип турар үезинде чүдүкчү чон субурганнарга барып турар. Ынчалза-даа ол хүннү Шагаа-биле холуп болбас. Шагааны бүдүн чон деңге уткуур, хамнар саңын салып, чалбарып тейлээр.

-Шагаа үезинде хам кижиге арыгладып-тарбыдадып алыры албан бе?

-Шагаа беттинде, бир ай бурунгаар арыглаашкыннарны эгелээр болза эки. Чүге дээрге хамга арыгладып алырыңарга, чаа чылды- Шагааны сагыш-сеткилиңер арыг уткуп алырга эки болгай. Чыл чиик эртер, моондактар чок болур. Ынчангаш Шагаа 21-де болза, январь төнчүзүнден мартка чедир хамнар чонун хүлээп, чай чок апаар үези.

-Ол дээрге мага-бодун арыглаарының дугайында, а бажың-балгадын кижи боду артыжап ап болур бе?

-Мен ону чүгле деткиир мен. Болур. Чүве болурга-ла хамнарже барып, оларны чалап-хооп турган ажыы чок. Бажың-балгатты арыглап, саңны шын салып, Чер-Дээр ээлеринден дузаны шын кылдыр дилеп, ол хамаан чок камгалалдарны бодуңар кылып өөренип алыксаар болзуңарза, мен силерни чалап тур мен. Шуптузун тайылбырлап, өөредип бээр мен. Шагаада база дөмей. Бажың-балгадыңар иштин арыглап-аштааш, артыжааш, өөңер ээзи, ачаңар, оглуңар саң салып алырга-ла чедер. Төл төрүттүнүп келирге база кижи бүрүзүнче чаш кижиниң хиннин тудуп алгаш, камгалал кылдырып барып турбас. Боду бичии хапчыгашка даарааш, артыжааш, сүдүн чажып, чаш кижиге аас-кежикти дилеп алыр. А хам кижи силерниң карааңарга көзүлбес чүүлдерни кылыр. Боду кылыптып болур болза – артыжаар, аъш-чем өргүүр, саң салыр – боду кылыр.

-Тайылбырыңар дээш улуу-биле өөрүп четтирдивис, Ялэва. Кел чыдар Чаа чыл уткуштур силерге бүгү-ле экини күзедивис!

ШАГАА ПО ВСЕМ ПРАВИЛАМ

В этом году новый год по лунному календарю – Шагаа – наступает в ночь с 20 на 21 февраля. Подготовку к празднованию нужно начинать заранее. Существует понятие месяца накануне Шагаа, который считается священным. В течение месяца до наступления нового года по лунному календарю тоже нужно успеть сделать многое. Расскажет об этом наш постоянный эксперт рубрики шаманка Ялэва.

«В ночь наступления нового года мужчины должны провести обряд “сан салыр”. Пусть это будет даже небольшое подношение духам Земли и Неба. Проводя этот обряд, нужно просить о здоровье и благополучии не только для себя лично, но и для всех близких, детей и старших родственников. К сожалению, в последнее время мужская часть населения забывает о традициях и необходимости проведения ритуалов. Придя к шаманам или в буддийский храм, в основном, можно увидеть женщин. Но в последние пять-шесть лет мужчины активнее стали участвовать в обряде “сан салыр”. Это хорошо!», – говорит шаманка.

Значение обряда «сан салыр» в Шагаа

– Этот обряд подношения духам в Шагаа символизирует конец долгой и холодной зимы, а человек, делающий подношения, таким образом благодарит духов и просит сил на новый год. В это время как раз просыпаются Хозяева Земли и Неба. Сан салыр — самый сильный обряд среди тех, что проводят на Шагаа.

Пока мужчины возжигают ритуальные костры на возвышенностях, женщины, оставшиеся дома, готовят еду и на восходе тоже делают подношение духам, разбрызгивая молоко или молочный чай. Дети стараются не проспать первые лучи солнца. Только когда солнце взошло, считается, что Новый год наступил.

Тогда же нужно провести ещё один обряд, который, к сожалению, сейчас позабыт. Называется он «харга кактаныыры», буквально – стряхивание на снег или на снегу. В первый день нового года наши предки выносили из юрты шкуры, одеяла, ковры и кошмы, свою одежду и, выбивая их об снег, избавлялись от всего плохого, оставляя негатив в прошлом году. Об этом обряде мне рассказывала бабушка, но у него есть ещё одна своя традиция, которой я с вами поделюсь. «Очистив» таким образом одежду и другие вещи, заносить в дом обратно их нужно окурив артышем, обмазанным топлёным маслом. Такой артыш называется «накормленным». Таким образом вещи избавляются от негативной энергетики, приобретённой за год, и становятся как бы новыми. А какой приятный запах потом стоит в доме!    

Шагаа в многоэтажке

-Что же делать жителям многоэтажек? Как подготовиться? Ведь мы сейчас, по обычаю, перед праздником проводим генеральную уборку, отдаём ковры в чистку. А как по правилам нужно окуривать помещение артышем?

-Окуривать квартиру нужно по часовой стрелке, начиная с входной двери. Таким образом, пройдя по всем комнатам, нужно вернуться к входу. Многие люди этим и ограничиваются. Но я считаю, что окурить артышем нужно и подъезд, «выкуривая», «выгоняя» злых духов прямо на улицу. Соседи ведь тоже проводят этот обряд. И что получается? Все «выгнали» зло в подъезд и там такой ужас творится! Откроете дверь и всё снова в вашей квартире.

Начать праздновать, садиться за стол можно только после проведения этих очистительных обрядов. Если же вы не спали всю ночь, ели, играли в игры, возможно, слушали сказку, то всё равно сначала нужно очистить вещи на снегу, окурить их артышем и только потом обратно заходить в дом.

-Правда ли, что если заснуть в ночь наступления нового года, то вас не внесут в список живых и вы окажетесь среди мёртвых?

-Нет. Спать можно. Я, например, если сильно устала, ложусь спать. Шаманы могут живого человека отличить от умершего, а Духи Земли и Неба и подавно. Миф о том, что спать нельзя появился потому, что первые лучи солнца имеют сильнейшую энергетику, которую человеку желательно впитать. И, чтобы не проспать, люди решили, что лучше совсем не ложиться.

-Можно ли пить алкоголь в Шагаа?

-Запрещено! Запрет этот основан на необходимом уважительном отношении к хозяевам Земли и Неба. Человек должен встретить Новый год, новый жизненный этап, в трезвом уме. Да и как просить благословения и счастья в пьяном состоянии?

Подарки на Шагаа

-Какие подарки нужно дарить на Шагаа? И была ли такая традиция?

-В Шагаа принято ходить в гости. И чтобы не идти с пустыми руками, можно взять с собой гостинцы, например, белую пищу. Но традиции дарить специальные подарки на Шагаа не было, особенно дорогие: золото-серебро. В последнее время стало традицией дарить пиалы с национальным орнаментом. Пиалы и вообще посуду нельзя дарить пустой. Можно положить фрукты, сладости, тувинский сыр и так далее. Ко мне посетители приходят обычно с плиточным чаем, я, в свою очередь, одариваю оберегами на новый год.

-В Туве Шагаа встречают по китайскому календарю, поэтому празднование приходится на самое морозное время. Ни о какой встрече весны и речи нет. Может ли, например, отдельно взятая семья встретить Новый год в день весеннего равноденствия? Слышала, что так делали.

-Да, день весеннего равноденствия 21 марта. Но смешивать его с Шагаа не нужно. Если вы хотите как-то отметить день весеннего равноденствия, то можете провести обряд «сан салыр» на ближайшей возвышенности или на перевале. Буддисты в этот день молятся у субурганов. Шагаа нужно встречать вместе со всеми. Шаманы в этот время камлают, просят поддержки у духов.

-Обязательно ли в Шагаа делать обряд очищения у шамана?

-Обряды очищения нужно проводить за месяц до наступления Шагаа. Таким образом, вы встретите новый год духовно обновлённым, а год будет лёгким и без препятствий.

-А можно ли обряд очищения жилья провести самостоятельно?

-Я только за! Не нужно бежать к шаманам чуть что. Если вы хотите научиться правильно проводить обряд «сан салыр», просить благословения у хозяев Земли и Неба, делать обереги для себя и близких, я вас научу. Обращайтесь.

И в Шагаа все обряды можно провести самим. Хозяйка дома должна очистить жильё и физически, и духовно, окурить артышем, сделать подношение Небесам. Мужчины дома сами могут разжечь ритуальный костёр. При рождении ребёнка тоже не нужно бегать по шаманам и гадалкам с пуповиной. Сами сшейте мешочек для пуповины, окурите артышем, сделайте подношение духам и попросите счастья и благополучия ребёнку. Шаманы делают то, что недоступно взгляду и пониманию обычных людей. А то, что можно сделать самому – окурить артышем дом, угостить духов местности и так далее – делайте сами. Только делать нужно правильно.

– Благодарю вас, Ялэва, и желаю в наступающем году всего самого хорошего!